అవును ఇది నా చివరి పోస్టు!

వివరాలు చెప్పేముందు, ఈవారం నా రచనల వివరాలు చెప్తాను.

ఈనెల విపుల మాస పత్రికలో నా కథ చట్టం దిద్దిన సంసారం వచ్చింది. నిజానికి ఈకథను మూడు సంవత్సరాల క్రితం నేను రాస్తూన్న వ్యంగ్యాస్త్రం శీర్షికలో ఒక అస్త్రం గా ఇచ్చాను. ఆ శీర్షిక ఆగిపోయినా వారి వద్ద రెండు అస్త్రాలు మిగిలిపోయాయి. అలా మిగిలిన వాటిలో ఒక అస్త్రం ఇది. అప్పుడే కొత్తగా ఏర్పరచిన గృహ హింస చట్టాన్ని వ్యంగ్యం చేస్తూ రాసిన కథ ఇది.

ఆదివారం వార్తలో కవర్ స్టోరీ మైకెల్ జాక్సన్ పైన నేను రాసిందే. కవర్ స్టోరీకి అనుబంధంగా బ్లాగ్ స్పాట్ లో కూడా జాక్సన్ కు సంబంధించిన బ్లాగులను పరిచయం చేశాను.

ఆంధ్రప్రభ సగటు మనిషి స్వగతంలో రేట్లు పెంచారని ప్రయివేట్ యాజమాన్యంతో పోరాడుతున్న తల్లితండృలను చూసి సగటుమనిషి ఆశ్చర్యపోయి ప్రత్యామ్నాయం సూచిస్తా
డు.

ఆంధ్రభూమిలో పవర్ పాలిటిక్స్ శీర్షికన ఉత్తర కొరియా రాజకీయాలాటల విశ్లేషణ వుంటుంది.
ఈనెల ఈభూమిలో నా రచనలు అక్షరాంజలి, రియల్ స్టోరీలపైన సమీక్షలు వచ్చాయి.
గురువారం చిత్రప్రభలో సినిమాలుగా మారిన నవలల చర్చ కొనసాగుతుంది.
ఇవీ ఈవారం నా రచనలు. చదివి మీ అభిప్రాయం చెప్పండి.

ఇక బ్లాగులో చివరి పోస్టు గురించి.

చావాకిరణ సహాయ సహకార సౌజన్యాలతో నేను ఒక వెబ్ సైటును ప్రారంభించాను. kasturimuralikrishna.com.

ఇక నుంచి నా రాతలు-కోతలన్నీ ఆ వెబ్ సైటులోనే జరుగుతాయి.

దాన్లో నా రచనలన్నిటినీ వుంచుతాను. అలాగే నా పుస్తకాల వివరాలన్నీ వుంటాయి. ఇవికాక నా రాతలెలాగో వుంటాయి.

నా బ్లాగును ఆదరించిన విధంగానే నా వెబ్ సైటునూ ఆదరిస్తారని ఆశిస్తున్నాను.

సెలవు

వెబ్ సైటులో కలుస్తూనేవుందాం!

సగటు మనిషి స్వగతం

ఇది ఆంధ్రప్రభ 28.6.2009 ఆదివారం అనుబంధం లో సగటుమనిషి స్వగతం శీర్షికన ప్రచురితం.

రేపు విడుదలవుతున్న నింగీ, నేలా, నాదే- అనే సినిమాను అందరూ, పిల్లలూ, పెద్దలూ, మొత్తం కుటుంబ సభ్యులూ అందరూ కలసి తప్పనిసరిగా చూడవలసిన సినిమా.

ఇది, చైనా సినిమా ఇన్విసిబుల్ వింగ్స్ కు తెలుగు తర్జుమా.

ఒక 15 ఏళ్ళ అమ్మాయి, ఓ దుర్ఘటనలో రెండు చేతులనూ కోల్పోతుంది. అయినా, అధైర్యపడక, అన్ని కష్టాలనూ ధైర్యంగా ఎదుర్కుని, తనకు ఎలాంటి ప్రత్యేక రాయితీలు అవసరంలేదని, ఆత్మశక్తితో ఆత్మగౌరవాన్ని నిలుపుకుంటుంది. అంగవైకల్యం శరీరానికేననీ, మనోశక్తితో అన్ని వైకల్యాలను అధిగమించి జీవితాన్ని సాఫల్యం చేసుకోవచ్చనీ నిరూపిస్తుంది.

ఈసినిమా చూస్తూంటే ప్రతి చిన్న కష్టానికీ కృంగిపోతూ, న్యూనతాభావానికి గురవుతూ, ఆత్మహత్యలవైపు పరుగిడేవారందరికీ బుద్ధివచ్చి స్ఫూర్తి జాగృతమవుతుంది.

తాము వెనుకబడి వున్నాము కాబట్టి తమకు చేయూతలేనిదే నిలబడలేమని దీనాలాపాలు, ఆక్రందనలు చేసేవారందరికీ, ఆత్మశక్తి, ఇచ్చాశక్తి అనే పదాల అర్ధాలు బోధపడతాయి. మనస్సాక్షి జాగృతమయి సిగ్గిలుతుంది.

మనిషికి తనమీద తనకు నమ్మకం వుంటే, ఏదయినా సాధించాలన్న పట్టుదల వుంటే, అతని ఆత్మబలం తప్ప మరెవెరి చేయూత అవసరంలేదన్న నిజాన్ని నిక్కచ్చిగా చూపుతుందీ సినిమా.

ప్రతి ఒక్కరూ, ఒకతికి రెండుసార్లు చూసి స్ఫూర్తిని పొందవలసిన అద్భుతమయిన సినిమా ఇది.

ఈ సినిమాను చలన చిత్రోత్సవంలో చూశాను. ఇప్పుడిది అనువాదమయి, పాటలు చేర్చుకుని వస్తోంది. చూడండి. ఇతరులకు చూపించండి. ఇలాంటి చిత్రాలను ఆదరిస్తే, మరిన్ని మంచి చిత్రాలు మనకందుతాయి. లేకపోతే, ఎవరూచూడరని. అవే ప్రేమలూ, అవే గెంతులు, పూబంతుల ప్రతీకల కుళ్ళు సినిమాలే మనకు గతి అవుతాయి.

కోతికొమ్మచ్చి సభ విశేషాలవే మరికొన్ని ఫోటోలిదిగో.

ఇవన్నీ బాపు, రమణల సన్మానానికి సంబంధించిన ఫోటోలు. ఈఫోటోల్లో, రావికొండలరావు గారి నిందాస్తుతి అక్షింతల ఫోటో కూడా వుంది.

సభలో, రమణ గారు ఉపన్యసించటానికి మైకు వద్దకు వచ్చి చేతులు జోడించగానే ఒక 10 నిముషాలు హాలు చప్పత్లతో దద్దరిల్లింది. అంతసేపూ వారు అలానే నిలబడి, ఇది చాలు నాకు, అన్నట్టు ఏమీ మాత్లాడకుండా వెళ్లిపోయారు. మరో 10 నిముషాలు హాలు దద్దరిల్లింది.

ఇది సభ విశేషాలను తెలిపే పోస్టు కావటంతో పుస్తకం వెల వివరాలు ఇవ్వలేదు. ఆ వివరాలను పుస్తక సమీక్షతో ఇస్తాను. అదీ అతి త్వరలోనే…..

పెద్దన్నకు గండపెండేరం ఎలా తొడిగారో నేను చూడలేదు. శ్రీనాథ కవి సార్వభౌముడికి మహా మహా సన్మానాలెలా జరిగాయో నేను చూడలేదు. ఆకాలంలో మహా కవులకు జరిగే సత్కారాలగురించి చదివి, ఊహించుకుని ఈకాలం లో ఎవరికీ ఎలాంటి విలువలేకుండా పోయిందే అని బాధపడుతూండేవాడిని.

రవీంద్ర భారతి కళావేదికపై బాపు రమణలకు జరిగిన సన్మానం, పుస్తకావిష్కరణలు చూసినతరువాత  మనసు అవ్యక్తానందంతో నిండిపోయింది.

ఈకాలంలో, కళాకారులకింత గౌరవం దక్కటం చూడటం నా భాగ్యంగా భావిస్తున్నాను.

అంతకన్నా ఆనందం కలిగించిన విషయం, బయట ప్రజలు ఎగబడి పుస్తకాలు కొనటం. ఇలాంటి దృష్యం ఈ జన్మకు చూస్తాననుకోలేదు.

నాకు ఆనందంతో పాటూ కాస్త అసూయకూడ కలిగింది.

ఎందుకంటే, ఎగబడి పుస్తకాలు కొంటున్నవారంతా నడివయసు, ఆపైన వారే. అంటే, ఇక భవిష్యత్తులో, ఇలా కొనేవారూ, చదివి మెచ్చేవారూ అరుదయిపోతారన్నమాట. కాబట్టి ఇలాంటి అపూర్వమయిన, బహుషా, మళ్ళీ చూడలేని సంఘటనకు నేను సాక్షినయ్యానన్నమాట.

అయితే, ఈసభ మరో విషయాన్ని నేర్పింది.

సభకుముందు కొందరు కళాకారులు బాపు రమణల సినిమా పాటలు పాడారు. దాన్లో మగ గాయకుడు వినోద్ బాల సుబ్రహ్మణ్యంలా పాడీ పాడీ ఏపాట పాడినా అలాగే పాడటం అలవాటయిపోయింది. గొంతు బాగుంది. కానీ, పాటలోని పదాలలో జీవంలేదు.

గాయిని సురేఖ కూడా కళ్ళు పాట తప్ప మిగతా పాటలన్నీ, తేలికగా పాడేసింది.

అయితే, మేము ఎదురుచూసిన పాట నిదురించేతోటలోకి పాడిన అమ్మాయి పాట వింటే శేషేంద్రనేకాదు, మహదేవన్ కూడా మళ్ళీ జన్మలో పాటల జోలికిపోరు. అంత అద్భుతమయిన పాటను ఎలాంటి ఫీలింగ్ లేకుండా ఇంత ఘోరంగా భావ రహితంగా పాడవచ్చని నిరూపించిందా అమ్మాయి. అయితే, పాట మొదట్లోనే, కణ్ణుల్లో నీరు తుడిచి అనగానే నా కళ్ళు వొళ్ళు సర్వం జలదరించి జలదరించి( ఎవరయినా దీన్ని బ్రాహ్మినికల్ ఆటిట్యూడ్ అంటే అనుకోవచ్చు. నాకేమీ బాధ, కష్టము, నష్టమూ లేవు)ఇంకా జలదరిస్తూనేవుంది. ఇలాంటి కార్యక్రమంలో ఏవో పాడాలి కాబట్టి పాడేరు తప్ప హృదయంతో పాడలేదు. కేబీకే మోహన్ రాజ్, గొంతుపోయినా, ఎవరికివారే ఈలోకం పాటను ఎంతో ఫీలింగ్ తో, అద్భుతంగా పాడాడు. అది చాలు ఆతరానికి, ఈతరానికి వున్న వ్యత్యాసాన్ని స్పష్టం చేస్తుంది. ఇప్పటివారికి శరీరం చాలు. దానికే అలంకరణలు చేసి గొప్పవారయిపోతారు. అప్పటివారికి శరీరం కన్నా ఆత్మపైనే దృష్టి. అందుకే అంత ఆత్మానందం కలిగిస్తుంది వారికళ. ఈసభలో రావికొండలరావు, అక్షింతలు అధ్బుతం. మళ్ళీ ఇలాంటి సభ, ఇలాంటి కళాకారులు, ఇలాంటి సన్మానం ఈజీవితకాలంలో చూడలేననే అనుకుంటున్నాను.

సభ విశేషాలు బొమ్మల్లో చూడండి.

ఈవారం నేను  కాస్త బిజీ, బిజీ!

రాతల పనులున్నాయి. కోతల పనులు బోలెడున్నాయి. అందుకనే, ఈవారం బ్లాగువైపుకు నేను ఎంతమటుకు వస్తానో చెప్పలేను. కాబట్టి నా బ్లాగులో కొత్త పోస్టులు లేకపోతే ఏమీ అనుకోకండి. క్రితం రెండువారాలు పుస్తకావిష్కరణ పనులవల్ల రాత పనులు దెబ్బ తిన్నాయి. అందుకని ఈవారం రాత పనులపైనే దృష్టి కేంద్రీకరించాల్సివస్తోంది.  అయితే, వూళ్ళోనే వుంటాను కాబట్టి, వీలు దొరకగానే రాసేప్రయత్నాలు చేస్తాను కాబట్టి బ్లాగుకు సెలవలు ప్రకటించటంలేదు.

ఇప్పతికే బ్రహ్మబుధ్ కు నాపైన కోపం వచ్చింది. వాడి అరుంధతి కథను నేను పూర్తిగా చెప్పనీయటంలేదని అలిగాడు. మన బ్లాగర్లు బ్లాగు అగ్రిగేటర్లమీద అలిగితే ఎలావుంటుందో వాడు నామీద అలిగితే అలావుంటుంది. అదే చెప్పా. చెరువుమీద అలిగినవాడి కథ చెప్పా. తీరిక దొరకగానే ముందుగా బ్రహ్మబుధ్ అరుంధతి కథ పూర్తిచేస్తానని వాడికి వాగ్డానం చేశా. బ్లాగుమీద అలిగి తెగతెంపులు చేసుకుని, తప్పు గ్రహించి మళ్ళీ వెనక్కు వచ్చిన బ్లాగర్లలా నాకు తీరిక దొరకటంకోసం ఎదురుచూస్తున్నాడు బ్రహ్మబుధ్.

సెలవు. త్వరలో కలుద్దాం.

నిన్న సభలో వల్లీశ్వర్ గారు, తీవ్రవాదం పుస్తకం గురించి మాట్లాడుతూ, పుస్తకంలో ఆయనకు నిష్పాక్షికత నచ్చిందన్నారు. నా ఫ్రెండొకాయన తాను రెగ్యులర్ గా రివ్యూలు రాసే పత్రికకు తీవ్రవాదం పుస్తక సమీక్షను రాసి తీసుకువెళ్ళాడట. ఆపత్రిక ఎడిటర్ పుస్తకంపై నా పేరును చూడగానే వీడు ఆరెస్సెస్ వాడు. వీడు తీవ్రవాదం గురించి రాస్తే ముస్లీం లను తిట్టటం తప్ప ఏమీ వుండదు, అని పుస్తకాన్ని నా ఫ్రెండు ముఖం మీదకు, సమీక్షను చెత్తబుట్టలోకీ విసిరేశాడట. ఇలా వుంటాయి మన రంగుటద్దాల ఆలోచనలూ, అపోహలూ.

ఈవారం వార్త ఆదివారం అనుబంధంలో బ్లాగ్ స్పాట్ శీర్షికన కెనేడియన్ న్యూ ఏజ్ మ్యూసిక్ గాయని మార్కోమె బ్లాగ్ పరిచయం వుంటుంది.

ఆంధ్రప్రభ ఆదివారం అనుబంధంలో ఎప్పటి లాగే సగటు మనిషి స్వగతం వుంటుంది. ఈసారి సగటు మనిషికి పెద్ద సందేహమే వస్తుంది. మందార మకరంద మాధుర్యం తెలియనివారి సంగతి ఏమిటన్నదాయన సందేహం.

ఆంధ్రభూమి వార పత్రికలో పవర్ పాలిటిక్స్ శీర్షికలో రాజకీయ విశ్లేషణ వుంటుంది.

గురువారం ఆంధ్రప్రభలోని చిత్రప్రభ అనుబంధంలో పథేర్ పాంచాలి నవలను సినిమాగా మలచటం గురించి చర్చ జరుగుతుంది.

కౌముది మాస పత్రికలో కథాసాగర మథనం వుంటుంది. మే నెలలో విడుదలయిన పత్రికలలోని 95 కథలలోంచి భిన్నంగా వున్న కహల పరిచయం జరుగుతుంది.

ఈభూమి మాస పత్రికలో మహమ్మద్ రఫీ పరిచయం పాడుతా తీయగా శీర్షికన వుంటుంది. నా జీవితంలో ప్రతి క్షణం నా వెంట వుండి తన పాటలతో నన్ను నడిపిస్తున్నాడు రఫీ. అందుకే వ్యాసం తూ ఇస్ తర్హా  సె మెరీ జిందగీమె షామిల్ హై, అన్నపాట తో ఆరంభమవుతుంది.

ఈనెల ఆంధ్రభూమి మాస పత్రికలో శ్రీశ్రీ పైన నేను రాసిన ప్రత్యేక విశ్లేషణాత్మకమయిన వ్యాసం వుంటుంది.

ఒకవైపు సాహిర్, మజ్రూహ్, షకీల్ ల పైన నావి మూడు పుస్తకాలు సిద్ధమవుతున్నాయి. సైన్స్ ఫిక్షన్ కథలు దాదాపుగా సిద్ధం.

ఇవీ ఈవారం నా రచనలు. చదివి మీ అభిప్రాయాన్ని నిర్మొహమాటంగా తెలపండి.

అనుకున్నట్టుగానే తీవ్రవాద పుస్తక పరిచయ సభ త్యాగరాయ గానసభలో ఈవేళ సాయంత్రం జరిగింది. ఎంబీయస్ ప్రసాద్ గారు, రాధశ్రీ గారు కార్యక్రమాన్ని నిర్వహించారు. హాసం సభ్యుల హాస్యకథల నడుమ తీవ్రవాదం పుస్తకాన్ని గుడిపాటి గారు పరిచయం చేశారు. వల్లీశ్వర్ గారు విశ్లేషించారు. నేను స్పందించాను. ఆ వివరాలన్నీ ఫోటోల్లో చూడవచ్చు.

ఈ సభలో మన బ్లాగర్లు, తురుపుముక్క మురళీమోహన్, పర్ణశాల కత్తి మహేష్ కుమార్, అరుణం అరుణలు కూడా వచ్చారు.

ప్రథమంగా నాపై, ఈ పుస్తకం పేరును కలిపి రాధశ్రీ గారొక కంద పద్యం చదివారు. ఆ పద్యం ఇది;

కుస్మములవంటి బ్రతుకులు
మసియై వసివాడుచుండ- మంచి మనసుతో
పసగల మురళీ కృష్ణుడు
ప్రసరించెను దృష్టి తీవ్రవాదము పైనన్.

ఫోటోలు చూడండి.

ఈనెల 27వ తారీఖు, అంటే, శనివారం సాయంత్రం 6 గంటల 30 నిఉషాలకు, త్యాగరాయ గాన సభ మినీ హాలులో, తీవ్రవాదం పుస్తక పరిచయ సభ, హాసం బుక్ క్లబ్ ఆధ్వర్యంలో జరుగుతుంది. ఆంధ్రప్రదేశ్ పత్రిక సంపాదకులు వల్లీశ్వర్ గారు, తీవ్రవాదం పుస్తకాన్ని నిర్మొహమాటంగా విశ్లేషిస్తారు. అందరికీ, ఇదే ఆహ్వానం.

ఆహ్వాన పత్రిక త్వరలో!