నా గురించి

నా పేరు కస్తూరి మురళీకృష్ణ. నేను ఎం.ఎస్సీ, ఎం ఎ చదివాను. రచన నా ప్రవృత్తి.

Jack of all - Master of none అనే సిద్ధాంతానికి నేను వ్యతిరేకం.  Jack of none - Master of all అని నమ్మే వ్యక్తిని. అందుకే తెలుగు సాహిత్యంలో ఉన్న వీలైనన్ని ప్రక్రియలలో రచనలు చేయాలని ప్రయత్నిస్తున్నాను.  విభిన్నాంశాల ఆధారంగా రచనలు చేస్తున్నాను.
1995లో ఆంధ్ర ప్రభ ’దీపావళి ‘ నవలల పోటీలో నా ‘అంతర్యాగం ‘ నవలకు ద్వితీయ బహుమతి, 1990లో ఆంధ్ర భూమి సస్పెన్స్ నవలల పోటీలో నా ‘ఆపరేషన్ బద్ర్ ‘ నవలకు ప్రత్యేక బహుమతి లభించాయి. అసిధార, అంతర్మధనం, మర్మయోగం నవలలు పుస్తక రూపంలో వచ్చాయి.  జీవితం – జాతకం, 4 x 5 , రాజతరంగిణి కథలు వంటి సంకలనాలు కూడా పుస్తక రూపంలో వచ్చాయి. 

భారతీయ తత్వ చింతన, మన ప్రధాన మంత్రులు, మన ముఖ్య మంత్రులు , 1857-మనం మరవ కూడని మహా యుద్ధం,పుస్తక రూపంలోకి వచ్చిన కాల్పనికేతర రచనలు.

ఇవికాక, 2001 నుంచి ఆంధ్ర భూమి వార పత్రికలో ‘పవర్ పాలిటిక్స్ ‘ శీర్షిక వారం వారం రాస్తున్నాను. పద్మ పేరిట అక్షరాంజలి శీర్షికన World’s Claasics ను తెలుగు పాఠకులకు పరిచయం చేస్తున్నాను.  వారం విడిచి వారం, వార్త దినపత్రిక ఆదివారం అనుబంధం లో  రియల్ స్టోరీస్ పేరిట మానవతా విలువలున్న కథలు పాఠకులకు అందిస్తున్నాను. జాగృతి వార పత్రికలో భారతీయ తత్వచింతన ఆధారంగా, ఆధునిక సమాజానికి ‘వ్యక్తిత్వ వికాసం ‘ శీర్షిక  అయిపోయింది.ఇప్పుడు రామ కృష్ణ మఠం వార్ దీన్ని పుస్తకంగా ప్రచురిస్తున్నారు.. చివరి వారం ‘కథసాగర మధనం ‘ శీర్షికన ఆ నెల ప్రచురితమయ్యే కథాకథన విశ్లేషణ జరుపుతున్నాను.  రసమయి మాస పత్రికలో హిందీ సినీ గేయ రచయితలు తమ పాటల్లో చూపిన చమత్కారాలను విశ్లేషించి, వివరిస్తున్నాను.దివ్య ధాత్రి అనే మాస పత్రికలో “ద్రష్ట” అనే చారిత్రాత్మక సీరీల్ వస్తోంది.ఇదే పత్రికలో,వ్యక్తిత్వాలను వివరించే కథలు వస్తున్నాయి.జాగృతి లో కొత్తగా మన సినిమాలలో మార్పుల గురించి శీర్షిక ఆరంభమయింది.ఆంధ్ర ప్రభ దిన పత్రికలో ప్రతి గురు వారం సినిమా సినెమా శీర్షికన సినిమాల గురించి వివరిస్తున్నాను.  

ఇవికాక, టివి స్క్రిప్ట్లు రాస్తున్నాను. కస్తూరి ప్రచురణలు  స్థాపించి ఉత్తమ సాహిత్యాన్ని  పుస్తక రూపంలో అందిస్తున్నాను.
ప్రస్తుతానికి ఇంత పరిచయం చాలనుకుంతున్నాను. మున్ముందు చెప్పుకోడానికి ఇంకా బోలెడంత ఉందిగా!